වෛද්‍ය සාෆි යළි රක්ෂිත බන්ධනාගාරගත කෙරේ
කුරුණෑගල රෝහලේ වෛද්‍ය මොහොමඩ් සාෆි මහතා ලබන 25 වන දා දක්වා රක්ෂිත බන්ධනාගාරගත කෙරිණි.
ඒ, සැකකරු කුරුණෑගල මහේස්ත්‍රාත් සම්පත් කාරියවසම් මහතා හමුවට ඉදිරිපත් කළ අවස්ථාවේදී ය.
සැකකරුට එරෙහිව එල්ල වී ඇති චෝදනාවල බරපතලකම සහ ඔහුට ඇප ලබා දුන්නොත් ඇති විය හැකි මහජන කැළඹීම් කෙරෙහි අවධානය යොමු කර තම අධිකරණය මෙම නියෝගය නිකුත් කරන බව මහේස්ත්‍රාත්වරයා පෙන්වා දුන්නේ ය.
සැකකරුට අයත් සියලුම දේපළ රජයේ තක්සේරුකරු ලවා තක්සේරු කර වාර්තාවක් කැඳවීමට ද මහේස්ත්‍රාත්වරයා එහිදී නියෝග කළේ ය.
වෛද්‍ය සෆි විසින් සිදු කරන ලද සැත්කම්වලදී පැලෝපීය නාළවලට හානි සිදු වී ඇත්දැයි අනාවරණය කර ගැනීම සඳහා මව්වරුන් 147 දෙනෙකුට සිදු කිරීමට නියමිතව ඇති එච්.එස්.ඩී. පරික්ෂණය තාවකාලිකව යළි අත්හිටුවීම ද මහේස්ත්‍රාත්වරයා නියෝග කළේ ය.
එම පරීක්ෂණ සිදු කළ හැකි නිවැරදි ක්‍රමවේදය කුමක්දැයි විශේෂඥ වෛද්‍යවරුන් 5 දෙනෙකුගෙන් සමන්විත කමිටුවකින් විශේෂ වාර්තාවක් ලබා ගෙන අධිකරණයට ඉදිරිපත් කරන ලෙසට කොළඹ විශ්වවිද්‍යාලයේ වෛද්‍ය පීඨයේ පීඨාධිපතිවරයාට නියෝග කළේ ය.
සැකකරුට එරෙහිව ත්‍රස්තවාදී කටයුතු සම්බන්ධයෙන් ප්‍රමාණවත් සාක්ෂි නොමැති නිසා ඒ පිළිබඳව ආරක්ෂක අමාත්‍යවරයාට වාර්තාවක් ඉදිරිපත් කිරීමෙන් අනතුරුව ඔහුගේ රැඳවුම් නියෝග අවලංගු කළ බව සැකකරු අධිකරණයට ඉදිරිපත් කරමින් අපරාධ පරීක්ෂණ දෙපාර්තමේන්තුව කියා සිටියේ ය.